我愛的人不是我的愛人
我有一個朋友, 能文能武, 如果係打機嘅世界佢好多方面都應該已經係A級, 但係佢苦惱緊一個問題, 最近就搵左我同佢一齊探討下, 就係佢次次對住女神, 往往chok 出一副嚴肅面孔, 樣樣做足100分, 務求做到經史子集、天文地理、電腦電話、搬搬抬抬樣樣皆能, 結果淪為人肉wiki, 然後次次都只係由一個雜卒升格成為糧草兵、運輸兵、高科技兵, 但係就永遠突破唔到兵的行列成為王子。
相反, 通常有意栽花花不發, 無心插柳柳成陰, 對住一D自以為無咩機會同佢發展嘅異性, 佢反而可以做返自己, 談笑風生, 將自己至真至誠一面展現係人前, 最後偏偏會開花結果。
呢一樣野令我諗起實際操盤個陣時, 我地有時即使睇中左個市, 但係都未必食到應哂, 因為我地成日會將目標著眼在賺錢上, 結果就好急甘搵機會, 但係越急就越操越錯, 正正同上面追求女神嘅例子一樣, 越在意, 越難發揮, 最後失敗收場。在人生上經常出現越唔志在, 越多意外的例子。當中「唔志在」而引致成功, 而「太志在」而引致失敗的分別, 正是「志在」一字。
在面對女神/賺錢時, 我地嘅目標放在想得得女神或者獲得盈利, 對得失看得好重, 但係就係呢種壓力令到自己唔係做岩嘅決定而係做想贏的決定, 令到自己打唔出自己節奏, 所以成日D人話炒股係真係要用自己閒錢, 唔計得失, 咁先可以好客觀地做到岩嘅決定，當你做岩決定，自自然然就會贏到錢，所以我地嘅目標係要做到係市場中唔志在得失，只志在對錯。
利申：我朋友不是我
