最近總係無咩動力去執筆，其實想寫的野好多，但係總係整理唔到個想法以致無咩動力去寫。但一見到偶像葉朗程連勾引王迪詩都夠膽寫搞到自己又心引起拎起支筆寫下拙作。
比起private banker，投機者的生活其實沉悶好多，至少唔會無啦啦走去買咖啡都遇到Daisy Wong，作為一個投機者唯一的好處就係易約。所以前排朋友約睇戲，即到。去到戲院，雖則見唔到王迪詩，但都睇到湯告魯斯，睇O既就正正就係異空戰士。
雖然套戲老老土土又係湯告魯斯 one man band 打足全場，但其實佢講緊O既野又幾投機。略略講下套野up 咩:
《異空戰士》發生在不久的未來，一群人類軍隊皆不可匹敵的外星異族，不斷向地球施襲。沒實戰經驗的少校威廉基治 (湯告魯斯 飾)，突然被調配到前線，執行尤如自殺的任務。基治在戰場上不到幾分鐘已陣亡，但他卻離奇地跌入時空循環中，被迫不斷重生，一次又一次經歷那場殘酷的戰爭，重複搏鬥然後死亡。
但基治在每一場戰役中，變得更有戰鬥力去應付敵人。他與特種部隊戰士莉達華達絲姬 (艾美莉賓特 飾)聯手對抗外星侵略者，每一次重覆的戰事，都讓他們逐步找到殲滅敵人的方法。
轉自: https://hk.movies.yahoo.net/movie/details/22382-%E7%95%B0%E7%A9%BA%E6%88%B0%E5%A3%AB3D%E7%89%88
今次個主角其實無咩威能，但佢有樣係人自細打機都常用的技能 Save Load 大法! 個主角有咩做錯左，又或者輸左，甚至唔夠打，無問題，做底自己，反反個save point，之後再練高個level 再打過! 而最屈機O既係即使反左save point 個主角D 記憶仲係度，知道哂敵人下一步會係點!一路聽一路心諗很想要吧，如果現實中有D 甘O既技能我仲唔發，反反去2007 年8月17日掃哂D AH 股call 同long 哂D 期指等3萬點，去到3萬點我今次唔會甘樣衰，我叻啦，轉身射個3 分波 put 爆佢，玩完呢2 轉拎埋D CASH 係08 年買反幾層九龍站，唔駛不斷重生，一鋪都夠我財務自由...可惜通常發夢發到呢個鐘數總會有個如花係個夢度叫醒你。
係現實之中唔會有呢d 甘好o既異能，有o既話學黃子華話好彩個個都唔會係你，但係至少我地可以模擬到呢種異能。講到呢種異能其實好似超能力甘，其實佢就潛藏係大家體內，不過無咩人有勇氣激發佢出黎，個異能名叫ZISHIT 中文係止蝕。止蝕其實係一種好大o既學問，唔止咩位止，幾時止，點樣止，點先要止，你敢唔敢止，你止唔止到，你止錯左又點，最大問題係你會唔會止先。中國人其實係好重感情的人，你睇下8 號仔就知道，到而家都仲甘多散戶HOLD 住佢就知其實佢地買股票係想同股票談戀愛直到海枯石爛，務求收息收到天長地久，唔係幫小超人講說話，但至少佢已經比d 2x9, 9x5, 23x6, 6x6個d 向下炒o既股票好，你買個時就好有概念，到你買左就得反懸念，你會諗極都諗唔明點解當時買個價又係5毛，而家個價又係5毛，但你身家就當時5皮變到而家真係得5毛。如果你諗住同隻股票鬥長命，你可以睇下以下呢幾隻--
330 Esprit 曾經的股王，由07年高位$11X一路落到而家$1X
1893 被遺忙的IPO 股王，07年12月上市，如果你係IPO 買左都仲好D，成本都係$4.5，如果你係上左市之後追入，盛惠最高$12，而家你都仲有$1.5 剩。
179 德昌電機 香港老牌股 曾經的熱炒股，係97年海嘯後成為焦點熱炒股，係2000年個時升到去頂峰，計落大約大約$300 左右 (佢又合下股，供下股甘)
1688, 1618, 817, 2007,etc
仲要唔好計仲有無數O既細價股
基本上你唔止蝕hold 住上面O既野，除非你個portfolio 真係做到好散，每隻佔你好少portion，如果唔係你人生中有幾多個十年去等佢地反生，仲要講緊人地拎住同一舊錢走左去買其他野，貧富懸殊就係甘又拉開左。
